Euskalia

Nazioartea: AEBEI, Ameriketako Estatu Batu Ez Indigenek, datorren astelehenean ospatuko dute Euskaliako Elkargoan sartu ala ez erabakitzeko erreferenduma. Mamadou Ortega presidenteak agindutako iraultza ez da gertatu, eta elkargoko kide diren Mexiko eta Kanadarako emigrazio-tasek areagotzen jarraitu dute azken hiru urteetan. Langabeziak eta garapenmaila eskasek jasangaitz bilakatu dute Gobernu zein Alderdi Errepublikarrarenganako presioa. Inkesten arabera, %80 inguruk baiezkoa bozkatuko du. Hala gertatuko balitz, Suitza Txikia, Mendebaldeko Korea eta Santa Klara Irla bakarrik geratuko lirateke Euskaliako Elkargotik kanpo Lur planetan.

XXIII. mendean euskaldunek gidatzen dituzte unibertsoko hamaika galaxiak, ehunka merindade eta milaka planetak, eta inoiz, inon ezagutu gabeko zorion eta ongizarte maila gozatzen dute bertako biztanleek oro.

Alabaina, beti dago matxinkontra petralen bat. Muturgogor barrutian, garai bateko espainiar kultura eta hizkuntzaren gailentasuna berreskuratu nahi lukete erresistentziako kideek, eta hori lortzeko estrategia pentsatu dute: XXI. mende hasierara bidaiatu, iraultza handia abiatu zen unera, eta hura posible egin zuten gertakariak zapuztu.

Zientzia Fikziozko kontakizun jostalari, lotsagabe eta zirikatzailea ondu du Mikel Alvarez Sarriegik Zubikarai bekaren laguntzaz idatzitako bere lehenengo nobela honetan, hango eta hemengo film, telesail eta komiki kuttunei hamaika keinu eginez eta euskal irakurleari irria piztuko dioten beste hainbat erreferentzia eskainiz, dela adarjotze, dela omenaldi.